21-га кастрычніка 2026 года на электронных таргах быў прададзены адміністрацыйны будынак, размешчаны ў вёсцы Сакорава Бешанковіцкага раёна.
Асаблівасць аб’екта – яго ўдалае месцазнаходжанне: усяго за 150 м знаходзіцца возера Паўазер’е. Пакупніком стаў адзіны ўдзельнік электронных таргоў – прыватная арганізацыя з Магілёўскай вобласці. У планах новага ўласніка – выкарыстоўваць нерухомасць для развіцця аграэкатурызму, паведамілі ў камітэце «Віцебскаблмаёмасць».
Варта адзначыць, што раней гэты аб’ект быў перададзены пад рэалізацыю інвестпраекта. Тут планавалі адкрыць аграэкасядзібу сямейнага тыпу “Утульнае гняздо”. Але, на жаль, ажыццявіць задуманае не атрымалася, і будынак вярнуўся ў дзяржаўную ўласнасць.
У камітэце спадзяюцца, што новы ўладальнік зможа ўцягнуць аб’ект у гаспадарчы абарот, адкрыўшы сучасны прывабны турыстычны аб’ект.
Спецыяльна для развіцця турыстычнай сферы камітэтам “Віцебскаблмаёмасць” быў сфарміраваны пералік аб’ектаў дзяржмаёмасці, якія не выкарыстоўваюцца. Гэты пералік рэгулярна абнаўляецца і на сёння налічвае 96 аб’ектаў. Азнаёміцца з ім можна на сайце камітэта.
