П’яны пацыент спрабаваў застрэліць міліцыянера ў Шуміліне. Што пагражае нападаўшаму?
У Шуміліне (Віцебская вобласць) затрымалі 46-гадовага мужчыну, які спрабаваў застрэліць супрацоўніка міліцыі з яго ж табельнай зброі. Стрэлу не адбылося “па незалежных прычынах, патлумачылі ў МУС.
Як усё здарылася
Увечары ў чацвер, 16-га красавіка, каля 23 гадзін у міліцыю патэлефанавалі відавочцы. Яны паведамілі аб хуліганстве. Супрацоўнікі, якія прыехалі на выклік, затрымалі мясцовага жыхара. Той быў моцна п’яны – экспертыза паказала 2 праміле. Мужчына папрасіў выклікаць яму хуткую. Міліцыянт суправадзіў яго ў лякарню.
Што адбылося далей
Ва ўстанове аховы здароўя затрыманы пачаў канфліктаваць з медперсаналам, а потым раптоўна напаў на супрацоўніка міліцыі.
Падчас барацьбы мужчына здолеў выхапіць табельны пісталет. Ён накіраваў зброю проста ў галаву супрацоўніку і націснуў на спускавы кручок.
Але стрэлу не здарылася. Прычына, як растлумачылі ў МУС, – “незалежныя ад грамадзяніна прычыны”.
Міліцыянт выбіў зброю з рук нападніка, і той збег з месца здарэння.
Злавілі хутка
На дапамогу супрацоўніку аператыўна падаспелі нарады. Уцекача блакіравалі на прылеглай да лякарні тэрыторыі і затрымалі. На месца асабіста выязджаў міністр унутраных спраў Іван Кубракоў.
https://www.youtube-nocookie.com/embed/cOxDFwUSpoQ
Што зараз
Следчыя распачалі крымінальную справу. Артыкул – замах на забойства супрацоўніка міліцыі. “Фігуранту пагражае да 25 гадоў пазбаўлення волі, або пажыццёвае пазбаўленне волі, або выключная мера пакарання”, – пракаментаваў начальнік упраўлення па Віцебскай вобласці ГУУБ МУС Канстанцін Клішэвіч.
