Аб гэтым паведамілі ў Віцебскім абласным камітэце прыродных рэсурсаў і аховы навакольнага асяроддзя. Таблічку пры валуне зрабілі чамусьці не на роднай мове.
У камітэце праінфармавалі:
– У 2025 годзе Шумілінскай раённай грамадскай арганізацыяй «ЭкаБум» была рэалізаваная грамадзянская ініцыятыва «Новае жыццё валуна «Вялікі камень».
На рэалізацыю праекту з абласнога бюджэту было выдаткавана 23 тысячы рублёў. Праведзена вялікая работа па добраўпарадкаванні прылеглай тэрыторыі, задзейнічаны працоўныя рэсурсы прадпрыемстваў і арганізацый раёна.
Таксама набылі VR-ачкі і стварылі відэафільм, які расказвае гісторыю валуна. На гэтым тыдні адбылася прэзентацыя гэтай грамадзянскай ініцыятывы, у якой прынялі ўдзел старшыня Віцебскага абласнога Савета дэпутатаў Дзмітрый Дзямідаў і старшыня раённага Савета дэпутатаў Руслан Мацвяйчук. Работнікі культуры раёна прадэманстравалі рэканструкцыю старажытнага абраду ўшаноўвання каменя, расказалі легенды, звязаныя з ім.
Прадугледжваецца, што рэалізацыя праекта дасць магчымасць зрабіць “Вялікі камень” яшчэ больш прывабным турыстычным аб’ектам, пашырыць экскурсійныя маршруты па Шумілінскім раёне і захаваць унікальную прыродную і гістарычную спадчыну для будучых пакаленняў.
Валун «Вялікі камень» лічыцца самым вялікім з камянёў, знойдзеных на тэрыторыі Беларусі, знаходзіцца ў вёсцы Горкі (15 км ад гарадскога пасёлка Шуміліна і 17 км ад гарадскога пасёлка Бешанковічы). Ён быў прынесены некалькі дзясяткаў тысяч гадоў таму ледніком з Выбаргскага масіва. Гэта не проста геалагічны помнік прыроды рэспубліканскага значэння, а візітоўка Шумілінскага раёна і важны аб’ект экалагічнага і турыстычнага патэнцыялу рэгіёну.
Фота телеграм-канала навіны Шумілінскага рэгіёна.
