П’яны пасажыр напаў на спадарожніка ў цягніку Віцебск – Мінск, піша Mlyn.by. Зламыснік ударыў мужчыну нажом у шыю: пашкодзіў сонную артэрыю і яремную вену. Пацярпелы ў рэанімацыі.
Як адбыўся напад
Усё здарылася на перагоне ля станцыі Барысаў увечары ў чацвер, 12-га лютага. П’яны 36-гадовы жыхар Віцебскай вобласці ўдарыў нажом свайго 45-гадовага спадарожніка з Бярэзінскага раёна.
Падазроны ехаў у трэцім вагоне цягніка і з самага пачатку паводзіў сябе абуральна. Нягледзячы на тое, што мужчына купіў месца на верхнюю паліцу, ён заняў бакавое. Таксама п’яны пасажыр абражаў спадарожніка-замежніка, абразліва жартаваў з дзяўчыны, якая ехала побач. У гарбату, якую прыносіла правадніца, дадаваў алкаголь.
Праз паўтары гадзіны шляху сітуацыя абвастрылася: мужчыны-спадарожнікі палаяліся і дамовіліся “выйсці” на станцыі Барысаў. Але зламыснік чакаць не стаў і параніў пасажыра лязом складанага нажа.
Пацярпелага знялі з цягніка
У момант удару цягнік ужо крануўся. Пацярпелага перадалі медыкам на наступнай станцыі – у Жодзіна.
Фота: УСК па Мінскай вобласці / mlyn.by
Да гэтага моманту дапамогу яму аказвалі відавочцы нападу.
“Медыкі дыягнаставалі ў яго колата-рэзанае раненне шыі з пашкоджаннем сонных артэрый, а таксама ярэмных вен”, – удакладнілі Mlyn.by ва УСК. Траўмы аднеслі да катэгорыі цяжкіх.
Нападніка затрымалі, у дачыненні да яго распачалі крымінальную справу за замах на забойства. Яму пагражае ад 6 да 15 гадоў зняволення.
