Не паспелі беларусы адчуць пацяпленне, як сіноптыкі прагназуюць моцныя арктычныя ўварванні і вяртанне маразоў ніжэй за -25°С. У Telegram-канале “Метеовайб” расказалі, калі чакаць такі холад і ў чым яго прычына.
Падзел палярнай віхуры на 2 ядры
Спецыялісты паведамілі, што ў бліжэйшы час здарыцца істотнае пацяпленне ў стратасферы, у выніку чаго значна аслабне палярная віхура. Сіноптыкі расказалі, што на працягу бліжэйшых двух тыдняў яна падзеліцца на 2 ядры, адно з якіх знікне. Настолькі слабая палярная віхура справакуе моцныя арктычныя ўварванні ў сярэднія шыроты (куды ўваходзіць і Беларусь) на працягу ўсяго лютага.
Калі ў Беларусі ўдараць маразы ніжэй за -25°С і як доўга гэта працягнецца
У Telegram-канале “Метеавайб” напісалі, што на пачатку наступнага тыдня, з 9-га лютага, з-за зрушэння халоднага ядра скандынаўскага антыцыклону на Беларусь тэмпература прыкметна ўпадзе. Уначы тэрмометры месцамі могуць зноў паказаць ніжэй за -25°С.
Прыход у Беларусь скандынаўскага антыцыклону пацвердзілі ў Telegram-канале Nadvorie. Ён выцесніць цёплае паветра на поўдзень. Па словах сіноптыкаў, аблокі рассеюцца, а ападкі спыняцца. Паводле прагнозу гэтых спецыялістаў, да раніцы нядзелі, 8-га лютага, па поўначы краіны будуць маразы ніжэйшыя за -15°С.
У канале Nadvorie дадалі, што анамальныя маразы працягнуцца ў Беларусі як мінімум да чацвярга, 12 лютага.
