У Беларусі з 24-га красавіка пачалася штогадовая вакцынацыя дзікіх жывёл ад віруса шаленства, расказаў намеснік міністра сельскай гаспадаркі і харчавання Іван Смільгінь, піша БелТА. Такія прафілактычныя мерапрыемствы за кошт сродкаў рэспубліканскага бюджэту праводзяцца ў нашай краіне з 2011 года.
Для імунізацыі дзікіх жывёл з выкарыстаннем авіяцыі раскідваюць невялікія прынады вагой каля 25 г. Брыкеты ад шэрага да цёмна-карычневага колеру зроблены з кампанентаў кармоў жывёл. Маюць спецыфічны пах. У прынадах – капсулы з вакцынай. Раскідваць прынады будуць у Брэсцкай, Віцебскай, Гродзенскай і Мінскай абласцях, акрамя населеных пунктаў і водных аб’ектаў, прыкладна па 24 штукі на квадратны кіламетр.
“У месцах правядзення работ людзям неабходна пазбягаць знаходжання ў зоне палёту самалёта, каб пазбегнуць траўміравання падаючымі прынадамі. Таксама забараняецца браць прынады рукамі і скормліваць іх свойскім жывёлам.
Не дапускаецца кантакт дзяцей з прынадамі”, – растлумачыў намеснік міністра. Ён таксама папярэдзіў, што пры трапленні вакцыны ў вочы і на слізістыя абалонкі трэба адразу звярнуцца да ўрача. З рук рэчыва можна старанна змыць.
Што з гадаванцамі і хатняй жывёлай
Намеснік кіраўніка ведамства рэкамендуе для мінімізацыі рызык захворвання на шаленства гадаванцамі не дапускаць іх кантактаў з дзікімі звярамі. Гэта ж датычыцца і сельскагаспадарчых жывёл.
Штогадовая прафілактычная імунізацыя – неабходная мера. “Сабак, катоў і іншых жывёл трэба выводзіць з кватэр у месцы агульнага карыстання толькі пры ўмове наяўнасці вакцынацыі супраць шаленства”, – сказаў Іван Смільгінь. Ён таксама адзначыў, што сабак-вартаўнікоў на жывёлагадоўчых і іншых аб’ектах таксама абавязкова вакцынаваць.
Сімптомы шаленства ў гадаванца
Прадстаўнік Міністэрства сельскай гаспадаркі і харчавання расказаў, што павінна насцярожыць гаспадароў у паводзінах гадаванцаў на ранніх стадыях захворвання.
Высокая тэмпература, пашыраныя зрэнкі, узмацняецца ўзбуджэнне, раздражняльнасць, невытлумачальны страх, святлабоязнасць, дрыготка, парушэнне каардынацыі – асноўныя першыя сімптомы заражэння шаленствам. Захварэўшая жывёла паводзіць сябе нязвыкла: ціхая становіцца гіперактыўнай і агрэсіўнай, жыццярадасная – наадварот, палахлівай, якая шукае месца, каб схавацца.
Сярод фізіялагічных і паводніцкіх адхіленняў могуць быць імкненне жывёлы з’есці неядомы прадмет, спалох ад гуку вады, слінацёк, хрыплы ці, наадварот, вісклівы брэх. Гадаванец таксама можа пачаць з азвярэннем грызці прадметы, ламаючы пры гэтым зубы.
Пры праяве сімптомаў заражэння і проста пры падазрэнні рэкамендуецца тэрмінова звярнуцца да лекара. Вірус шаленства смяротны, і адзіная абарона – прафілактыка.
Дзе прывіць жывёлу
Вакцынуюць жывёл у Беларусі паўсюдна. Можна звярнуцца як у дзяржаўныя, так і ў прыватныя ветэрынарныя клінікі. Абавязковая вакцынацыя ад шаленства праводзіцца ў раённых і гарадскіх ветстанцыях, ветэрынарных клініках і цэнтрах.
Імунізацыю супраць шаленства праводзяць з выкарыстаннем зарэгістраваных ва ўстаноўленым парадку антырабічных вакцын.
