Супрацоўнікі ГУБАЗіК МУС затрымалі ў Віцебску ўдзельнікаў арганізаванай злачыннай групы, якая дзейнічала ў канцы 1990-х – пачатку 2000-х гадоў. Аперацыю правялі пры сілавой падтрымцы байцоў спецпадраздзялення “Алмаз”.
Паводле звестак МУС, затрыманы чацвёра жыхароў абласнога цэнтра, раней неаднаразова судзімых. Следства ўстанавіла, што яны ўваходзілі ва ўзброеную групу і займаліся разбоямі, рабаваннямі і вымагальніцтвамі. Акрамя таго, фігуранты маюць дачыненне да забойства ахоўніка прыватнага прадпрыемства.
Па інфармацыі праваахоўнікаў, злачынства было ўчынена ў перыяд, калі ўдзельнікі групы патрабавалі грошы ва ўладальнікаў бізнесу.
У МУС зазначаюць, што праца па раскрыцці злачынстваў мінулых гадоў працягваецца ўвесь час. “Усе вінаватыя панясуць заслужанае пакаранне, нават праз дзясяткі гадоў”, – падкрэслілі ў ведамстве.
