21 сакавіка на XXХIII Мінскай міжнароднай кніжнай выставе-кірмашы гасцям прэзентавалі дадатак “Чытанка” – першы ў Беларусі мабільны дадатак, створаны спецыяльна для праслухоўвання аўдыёкніг на беларускай мове.
Ён ўключае каля 155 твораў мастацкай беларускай літаратуры, а ў цэлым у “Чытанцы” размешчана больш за 250 кніг. Гэта творы, якія фарміруюць культурны фонд краіны і дапамагаюць лепей зразумець багацце беларускай мовы і літаратуры. Праект распрацаваны пры падтрымцы Саюза пісьменнікаў Беларусі і Міністэрства інфармацыі.
Створаны і раздзел для самых маленькіх слухачоў, дзе ёсць творы дзіцячых пісьменнікаў на беларускай і рускай мовах. Дадатак абнаўляецца і становіцца зручней, да прыкладу, зараз любімыя кнігі можна пазначыць і захаваць для хуткага доступу, а таксама падзяліцца імі ў сацсетках і месэнджарах. З’явілася функцыя рэгулявання хуткасці праслухоўвання і звароту на месца, на якім скончыў слухаць мінулым разам. Цяпер у дадатку з’явіўся раздзел, дзе знакамітых класікаў можна паслухаць ва ўласным выкананні аўтараў.
Старшыня Саюза пісьменнікаў Беларусі Аляксандр Карлюкевіч адзначыў, што дадатак будзе цікавы нават для тых, хто купляе папяровыя кнігі і выбірае іх.
“Ёсць магчымасць захаваць любімую кнігу, а блізкім параіць звярнуцца да пэўнага рэсурсу. Думаю, што такія дадаткі падыходзяць дарослым, дзеці якіх яшчэ не пачалі вывучаць творчасць класікаў. Таксама гэта магчымасць пазнаёміцца з творамі сучасных пісьменнікаў. Для аўтараў гэта цудоўная магчымасць наладзіць сувязь з чытачом, стварыць адчуванне жывой сустрэчы з добрай беларускай літаратурай”, – адзначыў ён.
У дзіцячай пісьменніцы Кацярыны Хадасевіч-Лісавай у дадатку размешчаны творы “Крыштальныя ручаiнкi” і “Шчаслівая кніга”. “Кожная кніга, якую чытаюць, шчаслівая. А яшчэ больш шчасця ў кнізе будзе – можна будзе не толькі чытаць яе, але і паслухаць голас пісьменніка, яго аўтарскае прачытанне, мастацкае слова і разам з аўтарам адправіцца ў казку”, – падзялілася пісьменніца.
