У Telegram-каналах Nadvorie і “Метеовайб” прадставілі абноўлены прагноз па маразах на бліжэйшы тыдзень у Беларусі, і карціна выглядае вельмі сур’ёзна. Адразу 3 мадэлі надвор’я спрагназавалі ў рэспубліцы даўно нябачаныя замаразкі з -25°С і нават ніжэй.
Сіноптыкі “Метеавайба” патлумачылі, што на наступным тыдні, які пачнецца 5-га студзеня, на надвор’е ў Беларусі будзе ўплываць вышынная лагчына, якую пачнуць абгінаць струменевыя плыні з цыклонамі. Большую частку Еўропы, у тым ліку і нашу рэспубліку, ахопіць арктычнае паветра, якое пойдзе з поўначы еўрапейскай тэрыторыі Расіі і са Скандынавіі, дзе ў паўночнай частцы тэмпература амаль дасягнула -40°С. Прагноз па маразах у Беларусі на аснове 5 мадэляў У Telegram-канале Nadvorie папярэдзілі, што 9-га і 10-га студзеня ўварвання арктычнага паветра Беларусі не пазбегнуць. Мадэлі Метэаралагічнага бюро Злучанага Каралеўства (UKMO), Канадскага метэаралагічнага цэнтра (CMC) і Еўрапейскага цэнтра сярэднетэрміновых прагнозаў надвор’я (ECMWF) прагназуюць -20…-25°С і нават ніжэй у рэспубліцы. Так, UKMO да 3 гадзін суботы, 10-га студзеня, прагназуе -27°С на Віцебшчыне. У Гродзенскай вобласці ў гэты ж час -16°С.
У ECMWF карціна крыху мякчэйшая -21..-23°С на Віцебшчыне да 9 раніцы 10 студзеня і -6°С у Брэсце.
У сваю чаргу ансамблевыя мадэлі GEFS (Global Ensemble Forecast System) і ENS ECMWF кажуць аб менш агрэсіўным холадзе. Так, GEFS прагназуе, што да 9.00 10-га студзеня ў Беларусі будзе ад -9°С у Брэсце да -14°С на крайнім усходзе краіны.
Ансамблевыя пагодныя мадэлі – гэта калі прагноз лічаць не адзін раз, а адразу шмат разоў, робячы невялікія “варыяцыі” стартавых умоў (і часам самой мадэлі). Так атрымліваюць не адзін адказ, а “роскід” магчымых сцэнарыяў надвор’я і могуць ацаніць верагоднасць розных зыходаў. Калі большасць сцэнарыяў сыходзяцца, прагноз больш дакладны, калі моцна разыходзяцца, нявызначанасць вышэй. “Заклікаю сачыць за сітуацыяй”, – напісалі ў Telegram-канале Nadvorie. Там дадалі, што пакуль невядома, наколькі працяглае ўварванне холаду чакаем у Беларусі. Калегі з “Метеавайба” дапоўнілі, што моцныя маразы з -20°С, месцамі да -25°С чакаем у краіне і ў пачатку другой дэкады студзеня, гэта значыць з 11-га.
