Фота: ДАІ Віцебскай вобласці / Telegram

Смяротнае ДТЗ з удзелам лася адбылося на 90-м кіламетры трасы М-8 мяжа РФ — Віцебск — Гомель — мяжа Украіны, паведамілі ва УДАІ УУС Віцебскага аблвыканкама.

Трагедыя здарылася 15-га верасня каля 21.30.

Па папярэдніх звестках, 44-гадовы кіроўца Volkswagen Passat збіў лася, які раптам з’явіўся на праезнай частцы.

У выніку аварыі мужчына атрымаў цялесныя пашкоджанні, яго шпіталізавалі.

На пярэднім пасажырскім сядзенні ехаў 12-гадовы сын вадзіцеля. Ад атрыманых траўм хлопчык памёр на месцы здарэння.

Чаму нельга сігналіць пры выглядзе лася на дарозе

У Мінлясгасе расказалі, што апошнім часам дзікія звяры ўсё часцей сталі выходзіць на аўтамабільныя трасы. У выніку адбываюцца ДТЗ, у якіх атрымліваюць траўмы і гінуць людзі, а таксама жывёлы.

Найбольшую небяспеку ўяўляюць сутыкненні аўтамабіляў з ласямі. Гэтыя буйныя жывёлы павольна рэагуюць на пагрозы, у тым ліку на транспарт, які хутка рухаецца, што прыводзіць да аварый.

З канца жніўня да пачатку кастрычніка ў ласёў перыяд размнажэння. Яны становяцца больш актыўнымі і ў пошуках партнёра здольныя пераадольваць вялізныя адлегласці.

Таму гэтыя жывёлы могуць з’яўляцца ў абсалютна нечаканых месцах: на палях, ля населеных пунктаў. Таксама ўзрастае верагоднасць сустрэчы з сахатым і на дарозе.

Як пазбегнуць сутыкнення

Мінлясгас рэкамендуе вадзіцелям быць вельмі ўважлівымі, асабліва ў начны і вечаровы час, правільна выбіраць скорасць руху машыны, а на небяспечных участках прытармажваць.

Калі кіроўца ўбачыў лася побач з дарогай, трэба зменшыць хуткасць да мінімуму.

Не варта сігналіць пры выглядзе сахатага. Так можна справакаваць панічныя паводзіны ў жывёлы, што павялічвае рызыку сутыкнення з аўтамабілем.

https://tochka.by/articles/incidents/v_vitebskom_rayone_legkovushka_stolknulas_s_losem_pogib_rebenok/